Felagsskapur

Vit vilja, at børn og ung skulu vita, at tey eru ein týdningarmikil partur av okkara kommunu. Vit vilja, at øll børn og ung í okkara kommunu skulu hava møguleika fyri at luttaka í ymiskum barna- og ungdómsvirksemi, har rúm er fyri øllum – uttan mun til kyn, uppruna, førleikar ella sosiala bakgrund. Vit leggja dent á felagsskapin, at rúm er fyri øllum og at øll hava sín týðandi leiklut í felagsskapinum. Vit síggja ymisleikan sum eina styrki, og vit virða inklusjón og fjølbroytni.

Menniskju hava tørv á at hava samband við onnur. Saman við øðrum mennast vit. Í felagsskapinum verða vit knýtt saman, hildin uppi og hildin til. At hoyra til, at verða møtt og verða góðtikin, júst sum vit eru, hevur stóran týdning fyri øll menniskju. Tí ynskja vit at styrkja og skapa góðar karmar fyri sunnum og fjølbroyttum felagsskapum fyri børn og ung.

Øll børn og ung skulu hava møguleika at taka lut í fjøltáttaðum og virknum mentanarlívi og frítíðarlívi. Vit vilja, at skipaða virksemið er livandi við fjøltáttaðum upplivingum og avbjóðingum í einum tryggum og góðum umhvørvi. Øll børn og ung skulu kunna íðka og vera partur av einum góðum felagsskapi, á hóskandi stigi og undir tryggum kørmum. Somuleiðis vilja vit, at stovnar eru virknir við mennandi, kveikjandi og spennandi mentanarligum átøkum og frítíðartilboðum.

Børn og ung hava tørv á at uppliva, at tey eru ein partur av einum felagsskapi. Og at hjávera og gerðir hava týdning fyri okkurt ella onkran. At kenna, at tey eru partur av einum samanhangandi bólki og eru sameind við menniskju rundan um tey – bæði tey, sum eru nær og tey, vit møta gjøgnum dagin.

Hetta samspælið er eitt úrslit av tí fjølbroytni, sum er í einum felagsskapi. Tí skulu børn og ung læra um virðið í ymisleikanum, umframt at tey sjálvi skulu vera við til at skapa teir góðu felagsskapirnar – bæði millum teirra líkar, men eisini tvørtur um ymisleikan við bakgrund og tørvi.

Vit ynskja at byrjað verður tíðliga og málrættað, so børn og ung verða tryggjað eitt pláss í felagsskapinum so tíðliga sum gjørligt, eisini tá tað er trupult. Tí skulu starvsfólk, sum arbeiða við børnum og ungum, hava fokus á at duga at síggja tíðliga tá trupulleikar standast.

Vit vilja virka fyri, at børn og ung við serligum tørvi eisini hava møguleika at taka lut í felagsskapinum. Hetta setur krøv til, at starvsfólk hava neyðuga fakkunnleikan og krevur eitt tætt tvørfakligt samstarv millum geirarnar, frá okkum í býráðnum og til viðkomandi aktørar.