Gongur framtíðar fiskimálaráðs frúan ella harrin í Smílikulluni?

Ternumurtarnir verða grillaðir á báli

19.03.2021

Tað er nógvur ymiskur aktivitetur á frítíðarskúlanum Smílikulluni í Vága kommunu. Millum annað halda tey ungu javnan barnafundir saman við starvsfólkunum. Á barnafundunum verða ymisk aktuel samfelagslig evni viðgjørd. 

Ein fittlig søga á nýggju heimasíðuni hjá Smílikulluni er um, tá fiskivinnufundur og fiskivinnusamráðingar vórðu hildnar.

Smílikullan skrivar:

Samráðingar

Síðani grótkastið á sandinum bleiv gjørt, hava børnini funnið útav, at nógvur ternumurtur er at fáa heilt inni á sandinum. Hetta vóru gleðiboð hjá teimum, sum tíma at fiska, men eftir fáum vikum byrjaðu vit at síggja trupuleikar við óskipaðu fiskingini: Børnini vóru troytt av ikki at vita nær tey sluppu at fiska, tey vaksnu vóru ørkymlaði av nøgdini av fiski, sum fór til spillis. Hetta førdi við sær, at avtala var at hava ein fund um evnið, har børn og vaksin saman kundu koma við einari regluger fyri fiskingina.

Eini 12 børn og 2 vaksin møttu á fundinum, sum var hildin í stovuni týsdagin 2. februar. Samráðst var í ein góðan tíma, áðrenn ein semja, sum øll kundu góðtaka, var funnin.

Semjan um fiskivinnulóggávuna kann lesast her, umframt onnur fittlig tíðini úr dagligdegnum í Smílikulluni.