Móttøka fyri Bjarna Joensen hósdagin 3. apríl

02.04.2025

Hjartaliga vælkomin til móttøku at heiðra vinnulívsmannin Bjarna Joensen, sum hósdagin 3. apríl 2025 fyllir 90 ár.

Bjarni hevur sett stór spor eftir seg innan vinnulívið, serliga fiskivinnu. Sum ungur yvirtók hann smiðjuna J. K. Joensen, sum seinni fekk navnið Oilwind, og undir hansara tryggu hond vaks hon til at vera ein innovativ fyritøka innan fiskireiðskap. Hansara framsýni og ágrýtni hava havt stóran ávirkan á menningina av fiskivinnutólum, og hansara arbeiði hevur borið frukt bæði her heima og uttanlands.

Bjarni hevur altíð lagt dent á at skapa og menna loysir, sum ger arbeiðið lættari og betri fyri sjóvinnuna. Frá Vágasnelluni til framkomin trolspøl og línuskipanir – hansara uppfinningar og virksemi hava sett dømi fyri nýhugsan og dygd. Hann var ikki bert ein smiðjumeistari, men eisini ein uppfinnari og íverkseti, sum støðugt hugsaði um, hvussu fiskivinnan kundi mennast og gerast meira effektiv.

Ein av hansara mest kenda uppfinningum er Vágasnellan, sum hann var ein av undangongumonnunum at menna. Hendan snellan var ein sonn kolvelting fyri smábátaflotan, tí hon gjørdi fiskiskapin skjótari og meira skynsama. Ikki bara var hon praktisk, men hon var eisini snotuliga sniðgivin, eitt tekin um, at Bjarni eisini legði dent á design og ergonomi, sum var frammanfyri sína tíð.

Hansara smiðja arbeiddi eisini við menning av trolspølum og línuspølum, sum vóru ganglig fyri tann størra fiskiflotan, sum vaks fram gjøgnum áratíggjuni. Hetta fevndi um alt frá hydrauliskum og elektriskum skipanum til nýskapandi loysir, sum gjørdu arbeiðsumstøðurnar umborð betri og tryggari. Eisini lærdi smiðjan ung og evnarík starvsfólk upp, og mong eru tey úr oynni, og aðrastaðni úr Føroyum sum hava fingið sína yrkisroynd og útbúgving har.

Umframt at Bjarni var virkin innan maskinvirksemi, sá hann eisini møguleikar uttanfyri fiskivinnuna. Eitt dømi um hetta var, tá Oilwind var við til at menna vindmyllur langt áðrenn, at grøn orka bleiv eitt altjóða evni. Eisini var hann við til at byggja ein buss frá grundini saman við øðrum eldsálum í oynni, sum vísir hansara breiðu áhugamál og fjølbroytta hegni.

Fyri at heiðra Bjarna og hansara drúgva lívsverk verður boðið til móttøku hósdagin 3. apríl 2025 frá kl. 17 til 19 í bygdarhúsinum í Miðvági.

Vit fara at hugna okkum og heiðra mannin, sum hevur givið so nógv til vinnulívið og samfelagið her hjá okkum.

Øll eru hjartaliga vælkomin!