Týdningarmikið við góðari tilbúgving

08.04.2022

Náttina til hósdag hevði kavað illa, og tá flogfarið hjá Atlansflog lendi seint um kvøldið, var ikki koyrandi um Sandavágsháls og eini 15 bilar stóðu fastir í kavanum.

Men tilbúgvingin í Vága kommunu er góð. Á miðjari nátt varð heitt á sløkkiliðið í Vága kommunu um at hjálpa, tí Landsverk ikki byrjaði at grava aftur fyrr enn kl 05.

Dánjal Pauli Poulsen tilbúgvingarleiðari og Jónhard Selfoss frá sløkkiliðinum fóru norð á Háls, og fingu eini 10 bilar oman til Sandavágs, og ført nakrar bilar oman til tunnilin. Øll fólkini ið vendu oman av Hálsi komu inn á sløkkiliðsstøðina inni á kaiini, har Bjarni Prior, borgarstjóri tók ímóti og bjóðaði kaffi. Ímeðan fór Jónhard Selfoss, sum bæði er partur av sløkkiliðinum og maskinførari hjá Vága kommunu, ígongd við kavarudding uppi á Hálsi, so flog gestirnir kundu sleppa heim til hús. Klokkan hálvgum fýra á morgni leiddi Dánjal Pauli øll trygt norð til tunnilsmunnan.

Vit hava fingið sendandi myndir frá Dánjal Paula Poulsen, tilbúgvingarleiðara. Tað hevur stóran týdning við einari góðari tilbúgving í kommununi, og fólki sum altíð eru klár at hjálpa tá tørvur er á tí.